Nakkum February-ah Congress plenary session nei dawn

Congress party chuan nimin khan steering committee meeting neiin, nakkum February thla chawhnu lamah Chattisgarh-a Raipur-ah plenary session neih an rel. Plenary session-ah hian party president thar nemnghet a ni ang.

Party president thar Mallikarjun Kharge-a'n October thlaa charge a lak hnuah, party chhunga thuneitu sang ber, Congress Working Committee (CWC), chu ṭhiatin a aiah steering committee hi a din a, CWC member-te chu dah zui vek an ni.

Plenary session-ah hian Congress Working Committee din thar tur tihfel a ni bawk ang.

Nimina steering committee meeting-ah hian president Kharge bakah Sonia Gandhi, Rajasthan chief minister Ashok Gehlot, Chattisgarh chief minister Bhupesh Baghel, P Chidambaram, Anand Sharma, Meira Kumar leh Ambika Soni-te an tel.

Priyanka Gandhi hoin Mahila March nei dawn
Congress MP KC Venugopal chuan party hruaitu, Rahul Gandhi hoa Bharat Jodo Yatra neih mek a zawh hunah, nakkum hian thla hnih chhung chu general secretary Priyanka Gandhi Vadra kaihhruaiin 'Mahila March' neih a ni leh dawn tih a sawi.

Mahila March hi nakkum January 26 aṭangin March 26 inkarah ram chhunga state tin khawpuiah neih a ni ang.

Rahul Gandhi hoa Bharat Jodo Yatra neih mek hi nakkum January 26 hian Kashmir-ah an zo dawn a, an zawh ni chiahin Mahila March hi an nei ṭan leh nghal dawn a ni. Nimin khan Madhya Pradesh-a Bharat Jodo Yatra ni hnuhnung ber tur neih niin, tlaiah Rajasthan an lut. MP-ah hian yatra hi ni 12 chhung neih niin km 380-a thui an kal. September 7 aṭanga Kanyakumari, Tamil Nadu aṭanga an ṭan, Bharat Jodo Yatra an kal ni 88-na a ni.