Delhi Municipal Corporation inthlan nei
Municipal Corporation of Delhi (MCD) inthlan chu nimin khan neih a ni a, ward 250-ah candidate 1,349 an awm.
MCD hnuaiah division pathumte chhunfin an nih hnua inthlan neih hmasak ber a ni a, Delhi-a rorellai Aam Aadmi Party (AAP), MCD-a thuneihna chang mektu BJP leh Congress party-te chu inbei ber an ni.
Zing dar 8 aṭangin vote thlak ṭan a ni a, tlar 5:30 thleng hawn a ni. Inthlan result hi Nilainiah puan a ni ang.
BJP hian kum 24 chhung chu Delhi-ah hian assembly seat pakhat mah an la nei lo a, mahse hetichung hian kum 15 chhung chu MCD-ah hian an chak thung.
Vote thlakna tur hian polling station 13,638 siam a ni a, vote nei hi mipa 78,93,418, hmeichhia 66,10,879 leh transgender 1,061 an awm. Delhi state Election Commission chuan vote nei zingah hian kum 100 leh a chunglam mi 229 awmin, kum 80-100 inkar 2,04,301 an awm tih a tarlang.
Kum 2012-2022 chhung khan Delhi-ah hian corporation pathum - North Delhi, South Delhi leh East Delhi municipal corporation awmin, ward 272 a awm a ni. Kumin May 22 khan civic body pathumte hi chhunfinin, Municipal Corporation of Delhi din a ni.
Kum 2017-a civil body inthlan hi ward 270-ah neih niin, BJP chuan ward 181-ah hnehna a chang a, AAP-in ward 48 leh Congress-in ward 27 an la bawk.
Delhi Congress chief Anil Chaudhary chuan MCD inthlan tura hian voters' list aṭangin a hming paih a ni tih a sawi. Vote thlak tura a kal chu voters list-ah a hming a awm loh thu sawiin, vote a thlak ve thei lo. Midang eng emaw zat pawhin voters list aṭanga paih an nih thu an sawi tih tarlangin, he thil hi BJP te thiltih niin a puh.