TN-ah cyclone tleh vangin mi pakua thi

Tamil Nadu-ah thlipui, cylone Ockhi tlehin chhiatna a thlenah mi pakua an thi a, sangha mantu 80 leh lawng 50 chuang chin hriat lohin an awm bawk.

Ningani khan Tamil Nadu leh Kerala tuipui kamah thlipui hi a tleh a, ruahtui a ken tel vangin ruah pawh nasa takin a sur zui bawk. Thlipui hian Lakshadweep lam a pan a ni.

Kerala Fisheris Minister J Mercykutty chuan Indian Navy leh Coast Guard-te chuan thlipui a tleh hnu hian sangha mantu 33 leh an lawngte chu an chhanchhuak niin a sawi. Thlipui tleh vang hian Chennai colleter chuan khawpui chhunga school tan holiday a puang a, Chennai bakah Kanyakumari, Tuticorin, Kancheepuram, Villupuram, Madurai, Theni, Thanjavur leh Thiruvarur-ahte school khar a ni bawk.

Chin hriat loha awmte zawn hna hi thawh chhunzawm niin, a zawn hna thawk tur hian Navy chuan Dornier leh Advanced light helicopter (ALH) bakah diver-te a tirchhuak a ni. Kerala leh Tamil Nadu sorkar chuan bo zawn hna thawhnaah hian Navy, Coast Guard leh Air Force-te chu pui turin an sawm a ni.

Union Home Minister Rajnath Singh chuan chhanchhuah hna thawk tur inbuatsaih dante a ennawnpui a, National Disaster Response Force (NDRF) hotu pawh a be tawh bawk. NDRF team chu a ṭul huna che chhuak thei tura inrin tir an ni.