Railways-in Rajdhani Express tichangtlung

Indian Railways chuan Rajdhani Express tichangtlungin, 'Swarna' coach thar a dah. He pindar thar hi Sealdah-New Delhi Rajdhani Express ah siam phawt a ni.

Ministry of Railways chuan twitter-ah Rajdhani Express tihchangtlun a nih thu hi a puang a, hmasawnna ropui tak a nih thu a sawi. Project Swarna hnuaiah hian Rajdhani rel 14 and Shatabdi rel 15-te pawh upgrade an ni dawn tih a sawi. Tun thla tir khan Indian Railways chuan Rajdhani leh Shatabdi passenger-te chu an chuanna tur rel chu darkar khat aia tama tihkhawtlai a nih chuan an mobile phone-ah text message an dawn zel tur thu a lo sawi tawh a ni.

Indian Railways hian demonetisation hnua ticket counter-a cashless transaction a kalpui hnuah, ticket leitu mi matkaduai 23 zinga 3% chuan ticket lei nan hian credit/debit card an hmang. Railways data-a a lan danin, online booking sytem hmangin nitin rel ticket cheng vaibelchhe 80 man vel hralh a ni a, mahse ticket counter aṭanga sum faia ticket hralhchhuah nitin cheng vaibelchhe 78 vel a la ni a, heng zingah hian reserved ticket cheng vaibelchhe 30 leh unreserved ticket cheng vaibelchhe 48 hralh a ni. Rela zin, mi maktaduai 23 zinga 94% chu unreserved a zin an ni.