Uttar Pradesh-ah journalist kaphlum

Uttar Pradesh-ah Ningani khan mi tu tih hriat lohten Hindi chanchinbu-a thawk journalist pakhat an kaphlum.

Kanpur aṭanga km 60 vela hla, Billhaur-a Nagar Palika bazar bulah journalist Naveen Gupta chu mi pathum pali vel nia hriatten silaiin an kap a, damdawiin lam panpui a nih laiin a hliam tuar loin a thi a ni.

ADG Law and Roder chuan Naveen Gupta hi dawra a awm lai kah a ni a, misualte hi man thuai an nih theih nan theihtawp chhuah a nih thu a sawi.

Chief Minister Yogi Adityanath pawhin journalist kahhlum a ni chu pawi a tih thu leh, a chhungte a tuarpui thu a sawi a, state DGP Sulkhan Singh hnenah misualte man tur rang taka hma la turin a hrilh a ni.

Police-te chuan Gupta thah a nihna chhan hi an chhui mek a, mimal inhuatna thil vang a ni thei em tih pawh an chhui mek tih an sawi. Gupta chhungten complaint an thehluh hunah FIR pawh ziahluh a nih nghal tur thu an sawi.

Journalist thah a nih vanga lungawi loin, tualchhunga media mite leh journalists' union office bearer-te chuan emergency meeting an nei nghal a, tualthahna thleng an dem thu leh, chanchinbu mite himna tur dan leh thupek kenkawh a ṭul thute an sawi.

Kum 2015 June thla khan UP-ah hian journalist Jagendra Singh chu dik lo taka sand mining leh thildang kalpui a nih dan a haichhuah avangin Shahjahanpur district-ah halhlum a lo ni tawh bawk. Hemi kum vek October thlaah journalist Hemant Yadav chu UP-a Chandauli district-ah kahhlum a lo ni tawh bawk. Singh hi Hindi chanchinbu pakhat tan kum 15 a lo thawk tawh a ni.