Gujarat assembly inthlan thawh hnihna nei

Gujarat assembly inthlan thawh hnihna chu nimin khan assembly bial 93-ah neih a ni.

Bial 933-te hi district 14 huamchhunga mi niin, candidate 833 an awm a, political party 61-ten candidate an nei a ni. Candidate zingah hian chief minister Bhupendra Patel pawh a tel a, Ahmedabad-a Ghatlodia bialah a chuh.

Nimina inthlanna neihna bialah hian kum 2017 inthlanah khan BJP chuan seat 51 lain, Congress-in seat 39 bakah independent candidate-in seat thum an la.

Gujarat-ah hian assembly seat 182 awmin, December 1 khan bial 89-ah inthlan thawh khatna neih a lo ni tawh a, vote 63.31% a tla.

Inthlan thawh hnihna neihna bialah hian vote nei, mipa vaibelchhe 1.29 leh hmeichhia vaibelchhe 1.22 an awm. Vote thlakna tur polling booth 16,409 siam a ni a, electronic voting machine (EVM) 36,000 hman a ni bawk. Presiding officer 29,000 leh polling officer 84,000 chuang an awm.

BJP chuan bial tinah candidate siamin, Congress chuan bial 90-ah candidate a siam a, a thawhpui Nationalist Congress Party (NCP) in candidate pahnih an nei bawk. Bharatiya Tribal Party (BTP) in candidate 12 leh Bahujan Samaj Party (BSP) in 44 an nei.

Prime minister Narendra Modi chuan Ahmedabad-a Ranipi area-a polling station-ah vote a thlak a, a nu kum 99 mi Heeraben Modi pawhin Raysan khuaah vote a thlak. Union home minister Amit Shah chuan Naranpura area-a municipal centre-ah vote a thlak a ni.

Inthlan hma ni, Pathianni zan khan Banaskantha district-a Danta biala Congress MLA ni lai, Kanti Kharadi chu mi tu tih hriat lohten an bei. Congress party chuan BJP-te thiltih niin an puh a, party hruaitute chuan he thil thleng an dem thu leh, hetih laia Election Commission of India (ECI) lam an ngawi reng chu an hriatthiam loh thu an sawi.