Rajasathan-ah Bharat Jodo Yatra nei ṭan

Congress party hruaitu Rahul Gandhi hoin nimin aṭang khan Rajasthan state-a Bharat Jodo Yatra an kal ṭan leh ta.

Rahul Gandhi hi Madhya Pradesh-ah ni 12 chhung a kal hnuin Pathianni tlai khan Rajasthan hi a lut. Chanwali chauhan-ah Gandi leh yatra-a telte lawmna hun hi Congress party chuan an buatsaih. Nimin zing dar 6.10 aṭang khan Jhalawar district aṭangin a kal ṭan leh a, chief minister Ashok Gehlot leh a deputy hlui, Sachin Pilot-ten an kalpui. Anni bakah party AICC general secretary (organisation) KC Venugopal, Rajasthan Pradesh Congress Committee chief Govind Singh Dotasra, senior leader Bhanwar Jitendra Singh leh food and civil supplies minister Pratap Singh Khachariyawas-te an kal ve bawk.

Rajasthan-ah hian ni 17 kalin Jhalawar, Kota, Bundi, Sawai Madhopur, Dausa leh Alwar district-te an patlang dawn a, km 500 chuang kallin December 21-ah Haryana an lut ang. Nimin bikah khan km 14 kalin, tlai lamah Chandrabagha chauraaha-ah corner meeting an nei a, Jhalawar sports complex-ah zan an riak.

Rahul Gandhi hian December 15-ah Dausa-a Lalsot-ah loneitute nen an inkawm dawn a, December 19 hian Alwar-a Malakheda-ah vantlang inkhawmah thu a sawi ang.

Bharat Jodo Yatra vang hian December 7 aṭanga ṭan tur, Parliament Winter Session-ah Rahul Gandhi hi a tel hman dawn lo a, ani bakah party hruaitu eng emaw zat pawh yatra lamah an tel zawk dawn nia sawi a ni. Parliament session hi December 7 - 29 chhungin neih a ni dawn a ni.