Manmohan-an GST leh demonetisation sawisel

Prime Minister hlui, Congress hruaitu Manmohan Singh chuan Prime Minister Narendra Modi-a kaihhruai sorkarin pawisa note lian a tihthih leh, chhiah lak dan thar a siam Goods and Services Tax (GST) a siam chu a sawisel.

PM Modi chuan pawisa note tihthih leh GST in mipuite chunga nghawng a neih dante, harsatna a siam dante chu a hrethiam pha lo niin Manmohan Singh chuan a sawi. Pawisa note tihthih chu ruahmanna mumal lo tak hnuaia siam niin a sawi a, GST pawh hmanhmawh taka felhlel taka thutlukna siam a ni tiin, rorellai party thil kalpui dan chu lungchhiatthlak a tih thu a sawi.

Congress hruaitu chuan PM chuan zahawm leh awmze nei zawka mipuite hneh a, an vote neih dan kawng zawng se a duh thu a sawi bawk.

Surat-a tualchhung sumdawng mite nena hun an hmannaah, Manmohan Singh chuan pawisa tihthih in harsatna a thlen aṭanga insiamṭha tura hma an lak mek laiin, GST chu sorkarin a rawn kalpui leh nghal a, hemi chungchangah hian tualchhung sumdawngte chu rawn an ni lo a, an dinhmun an hriatthiam lo a ni, a ti.

Singh chuan, "Prime minister chu Gujarat mi a ni a, Gujarat leh mi retheite dinhmun chu midang zawng aiin a hrechiang zawk niin a insawi a ni. Mahse engatinge a thutlukna siamin mipuite tana natna leh harsatna a thlen dante hi a hriatthiam theih si loh?" tiin a sawi.

Black money leh chhiat awlruk ṭhin vanga buaina chinfelna chu pawisa note tihthih a ni lo tih sawiin, Singh chuan pawisa note tihthih chuan a ṭhatna a thlen aiin chhiatna a thlen a nasa zawk a ni, a ti.