Pakistan-in ṭum 724 inkahhai thuthlung palzut

Pakistan sipaite chuan Jammu and Kashmir-a Line of Control (LoC)-a India leh Pakistan sorkarin inkahhai an puan chu kumin chhungin ṭum 724 zet an palzut tawh.

Union Home Ministry data-a tarlan a nih danin, Pakistan sipaiten ramri-a inremna an palzut hi kum sarih chhunga a tam ber ṭum a ni. Kum 2016-a ramri-a silai an hmehpuah zat hi ṭum 449 a ni.

October thla thleng khan ramri-a silai hmehpuah vanga thi hi civil mi 12 leh security force mi leh sa 17 an awm tling tawh a, civil mi 79 leh security mi 67 ten hliam an tuar bawk.

India leh Pakistan hian Jammu and Kashmir-a International Border, Line of Control leh Actual Ground Position Line-a inkahhai thuthlung an siam hi kum 2003, November thla aṭang khan hman ṭan a ni.

Ram pahnihte ramri hi km 3,323 zeta thui niin, heng zinga km 221 chu IB a nia, LoC km 740 thui a awm bawk.

Kum 2016 khan ramri-a inkahna, ṭum 449 thleng vangin civil mi 13 leh security mi 13 an thi a, civil mi 83 leh security mi 99 in hliam an tuar bawk. Kum 2015 khan ramri-a inkahhai thuthlung hi ṭum 405 palzut a ni a, kum 2014 khan ṭum 583 inremna thuthlung hi palzut a lo ni bawk a, civil mi 14 leh security mi pathum kahhlum an ni a, civil mi 101 leh security mi 28 in hliam an tuar thung.