Gujarat Police-ten TMC thupuangtu an man

Trinamool Congress (TMC) chuan an party thupuangtu, Saket Gokhale chu Morbi lei chim chungchanga twitter-a a thu post avangin Thawhṭanni zan khan an man tih a sawi.

Saket Gokhale hi Thawhṭanni zan khan New Delhi aṭangin Jaipur, Rajasthan a pan a, a thlen hian Gujarat police-te chuan an lo man nghal niin TMC MP Derek O'Brien chuan a sawi. Police-te hian a chhungte biak nan minute hnih vel hun an pe a, hemi hnu hian a thil neihte pawh laksak vekin, Ahmehdabad an panpui nghal a ni, a ti.

Derek O'Brien chuan Ahmedabad police-a cyber cell chuan RTI activist-turned-politician Gokhale hi a tweet avanga an man thu a sawi. October 30 khan Gujarat-a Morbi khuaa lei chu cheiṭhat a nih hnua an hawn aṭanga ni li lekah chimin, mi 130 an thihphah a ni.

TMC hruaitu chuan Gokhale man a ni chu BJP-in politics lama phuba lak tumna nia sawiin, mahse TMC leh eptu party dangte chu an ngawi mai mai dawn lo tih a sawi nghal bawk.

Hetih lai hian Ahmedabad Cyber Crime Cell-a Assistant Commissioner of Police (ACP), Jitendra Yadav chuan Gokhale hi PM-in Morbi a tlawh chungchangah thu dik tawk lo thehdarhah puha complaint an dawn avangin FIR an ziaklut a, hei vang hian Jaipur-ah hian a lo man niin a sawi.

Gokhale hian Gujarat chanchinbu pakhatin RTI zawhna chhanna aṭanga a landanin, Morbi lei a chim hnua PM Modi-a'n a tlawh ṭum khan Gujarat sorkar chuan cheng vaibelchhe 30 a hmang nia a chhuah chu a twitter-ah hian a tilang a ni. Darkar reilote chhunga PM Modi-a buaipuina atana an senso chu lei chima nunna chan mi 135-te nunna aiin a hlu zawk tiin a ziah belh a ni.