NC President atan Farooq Abdullah thlang leh

Jammu and Kashmir-a National Conference (NC) president atan kum 85 mi, Farooq Abdullah chu chuhtu awm loin thlan nawn leh a ni.

Thawhṭannia NC founder Sheikh Muhammad Abdullah piancham vawi 117-na puala Srinagar-a Hazratbal-a a thlan bulah NC palaite chu kalkhawmin, kalkhawm hmaah Dr Abdulla chu party president atana thlan nawn a nih thu puan a ni.

Party president atana thlan nawn a nih hnua thu a sawiah, Abdullah chuan, "President nih chhunzawm hi ka duh tawh lo a ni. Mahse NC mi leh saten ka chawl thei lo tiin min nawr a, ka lo remti ta a ni. Mahse hruaitu thar, ṭhangthar zawkin party hi a kaihhruai tura an inbuatsaih chhoh a ngai a ni," a ti.

Dr Abdullah chuan state mite chu Bengali-ten BJP-in kawng hrang hranga tihchhiat a tum chunga Mamata Banerjee an thlawp tlat anga rilru nghet pu ve turin a chah. "Telangana leh hmun dangah legislator-te an lei dante pawh kan hmu a, helai hmunah pawh an rawn tum ve ngei dawn a ni. Mahse kan rilru nghetzia kan lo lantir a ngai," tiin a sawi. Sorkar laipui leh Army-te chu J&K-a inthlanah inrawlh lo turin a ti nghal bawk.