PM Modi-a'n BJP meet a hawng

Prime minister Narendra Modi chuan BJP hruaituten ni hnih awh tur meeting an neih chu Thawhṭanni khan New Delhi-ah a hawng.

Kum 2024 Lok Sabha inthlanpui neih tur atan leh, state assembly thlanna neih tur atana inbuatsaih dan leh an kalphung turte sawiin BJP national office bearers meeting hi neih a ni a, Delhi-a party headquarters-ah neih a ni. Meeting-ah hian national office bearers-te bakah, state unit tina president leh general secretary-te an tel a, party national president JP Nadda-a'n meeting hi a kaihruai a ni.

PM Modi hi Thawhṭannia Gujarat inthlan thawh hnihna neihah vote thlakin, vote a thlak hnuah meeting-a tel tur hian Delhi a pan leh nghal a ni.

Meeting-ah hian inthlan awm tura atana inbuatsaih dante sawiho a nih bakah, an party hnuaia pawl hrang hrang hmalak dante thlirho a ni bawk. Kum 2019 Lok Sabha inthlanpui an party chak tawk lohna hmunahte hma la turin pary hruaitu hrang hrang, union minister-te pawh telin ruat an ni a, kum 2024 inthlanpuiah an seat hlohnaah hian chak ngei tumin ṭan a la chho a ni.

Lok Sabha inthlanpui neih hma, nakkum hian state eng emaw zatah assembly inthlan neih a ni dawn bawk a, heng zingah hian Karnataka, Madhya Pradesh leh Rajasthan-te pawh an tel.

Prime Minister chuan meeting-a telte hnenah India-in G20 presidency a chelh mek chungchang leh a pawimawh dante chu mipui hrilh hre turin a chah a, India-in he dinhmun a chelh hi India mipui tinte chuan an chhuang em em tur a ni, a ti.