Cabinet-in Human Resource Development ministry Education Ministry tia thlak a remti

Prime minister Narendra Modi kaihhruaia nimina union cabinet meeting chuan Human Resource Development (HRD) ministry chu 'Education Ministry' tia thlak a remti a, National Education Policy (NEP) thar pawh a pawm bawk. 

Indian Space Research Orga­ni­sation (ISRO) hotu hlui K Kastu­rirangan kaihhruai panel chuan nikum khan union HRD minister Ramesh Pokhriyal Nishank hnenah NEP thar draft hi an lo thehlut tawh a ni. He policy thar chungchangah hian ministry chuan stakeholder hrang hrangte thurawn ala a, rawtna nuai hnih chuang zet an dawng.

 

NEP hman mek hi kum 1986-a siam niin, kum 1992 khan siamṭhat a ni. Kum 2014 inthlanpui neih dawna BJP manifesto-ah khan education policy thar siam hi an lo telh tawh a, kumin May thla khan PM chuan education sector lam siamṭhat a ngaih thu a lo sawilang tawh bawk. National Education Policy (NEP) tharah hian Right to Education Act 2009 chu naupang kum 3-18 huamtir a ni dawn a, a hmain he policy hian kum 14 chin chauh a huam a ni. Hei bakah hian school education curriculum-a content load pawh tihtlem rawt a ni bawk. 

Co-curricular leh extra-curricular area ṭhen hran ni tawh loin, subject zawng zawng - arts, music, crafts, sports, yoga, community service-te pawh huam vekin, curricular-ah telh vek an ni tawh ang.