Rahul Gandhi-an party president chuh turin nomination thehlut

Congress vice president Rahul Gandhi chuan, party president chuh turin nimin khan AICC headquarters-ah nomination paper a thehlut ta.

Party president candidate atana Rahul Gandhi rawtna, nomination (proposer) paper thehlut pawh 90 chuang zet a awm bawk.

Nomination a thehluh fel hnuah, Rahul Gandhi chuan Prime Minister hlui Manmohan Singh leh party hruaitu hlun dangte a hmu nghal a ni. Manmohan Singh chuan Rahul Gandhi chu Congress party mi duhtak a ni a, an party kalphung ropui takte chu a chhawmnung zel dawn a ni, a ti.

Party president atana Rahul Gandhi rawtna, nomination (proposer) thehlut hmasa ber zingah party hruaitu hlun Kamal Nath, Sheila Dikshit, Motilal Vora leh Tarun Gogoi te an tel. Rahul Gandhi-an nomination paper a thehlut lai hian an thlawpna lantirin Congress state unit chief, senior leader, Pradesh Congress Committee palaite pawh party central office-ah hian an awm a ni.

Congress president chuh tumte chuan nimin thleng khan nomination paper an thehlut thei a,nimin tlai thleng khan Rahul Gandhi tih loh midang thehlut an awm lo. Party president hi inthlan hmanga thlan chhuah ṭhin a ni a, mahse Rahul Gandhi hian chuhpuitu a neih loh chuan inthlan ngai loin tlinga puan a ni ang.

Rahul Gandhi hi kum 2013 khan Jaipur-a party khawmpui lianah party vice president atan dah a ni.