Cyclone Ockhi-in Maharashtra leh Gujarat lam a pan zel

Tamil Nadu leh Kerala nuaitu thlipui, cyclone Ockhi chuan Maharashtra leh Gujarat lam a pan.

Cyclone Ockhi tleh hian Tamil Nadu, Kerala leh Lakshadweep-ah chhiatna a thlen nasa hle a, thlipui tleh leh ruahsur nasain chhiatna a thleng vanga thi hi Kerala state-ah mi 28 an tling a, mi 90 vel chu chin hriat lohin an la awm bawk. Tamil Nadu-ah pawh mi 19 an thi a, chin hriat lohin mi 96 an la awm a, mi 690 chhanchhuah an ni bawk. Tamil Nadu sorkar chuan thlipui tleh hian chenna in 74 a nuai chhe vek a, in ṭhenkhat chhia 1,122 a awm bawk a ni.

India Meteorological Department (IMD) chuan thlipui hian hmar–hmarchhak lam panin, Gujarat chhim lam leh Maharashtra hmarlam tuipui kamte chu tukin hian an thleng dawn niin an sawi a, mahse thli tleh nat lam hi a ziaawm deuh tawh dawn niin an sawi.

IMD director general KJ Ramesh chuan Gujarat state pawh ruah nasa taka sur thei a nih thu hriattir an ni tawh tih a sawi a, vawiin hian Konkan hmar lam,Mumbai telin ruah nasa tak a sur rin a nih thu a sawi.

Thlipui hlauhawm lam hi Pathianni khan 'very severe' aṭangin 'severe' ah a tla hniam tawh niin weather department chuan a tarlang. Maharashtra, Goa leh Karnataka tuipui sangha mana chhuak ṭhinte pawh Nilaini thleng chu tuipuiah chhuak rih lo turin an ngen.

Thlipui tleh hnua chin hriat loha awmte zawn hna hi thawh chhunzawm zel a la ni a, Indian Navy, Indian Air Force leh Coast Guard-te chuan an vaia chhanchhuah an nih hma chu chhanchhuah hna beihpui an thlak chhunzawm zel dawn tih Defence Minister Nirmala Sitharaman-i chuan a sawi. Minister chuan tuipui kama chengte chuan dinhmun hrehawm tak an tawk mek tih a sawi a, sorkar chuan an harsatna chhawk tur hian theihtawp a chhuah zel dawn a ni, a ti. Prime Minister leh Home Minister hnenah pawh thil awmdan a hrilh tur thu a sawi. Defence Minister hian Kerala Chief Minister Pinarayi Vijayan pawh hmuin, state dinhmunte an thlir let a ni.