SC-in sorkar laipui hriattirna pe

Supreme Court chuan sorkar laipui hnenah Central Delhi, Jantar Mantar leh a chhehvela nawrh huaihawt phal tura ngenna thehlut chungchangah hriattirna a pe.

Justice AK Sikri leh Justice Ashok Bhushan awmna bench chuan dan leh thupek kenkawh a ṭul rualin, mipuite chuan nawrh huaihawt a, punkhawmna siam turin dikna an nei tel tih hriat a ngai tih a sawi. Sorkar laipui hnenah chuan Central Delhi-a nawrh huaihawt theihdan tur ruahmanna a siamte hriattir turin a ti a ni.

Sorkar laipuiin Jantar Mantar leh a chhehvela nawrh huaihawta pungkhawm a khap chungchangah, Mazdoor Kisan Sahkti Sangathan (MKSS) chuan Supreme Cour-ah petition a thehlut a, India Gate-a Boat Club area-a boruak muanawm tak hnuaia nawrh huaihawt phalsak turin a ngen a ni.

Court chuan Traffic Advisory body hnenah nawrh huaihawt a nih pawha traffic a nghawng buai lohna tura inkaihhruaina duang turin a ti bawk a ni.

Petition thehluttu chuan Right tor Protest chu fundamental right a ni tih sawiin, sorkar chuan hemi dang tur hian CrPC Sec-144 a hmang ngawt thei lo a ni, a ti.

Hetih lai hian Jantar Mantar road-a chengte chuan nawrh leh punkhawm huaihawt ṭhin chu boruak muanawm tak leh hrisel tak hnuaia an khawsakna palzut sakna nia sawiin petition an thehlut ve bawk. Justice RS Rathore-a kaihhruai NGT bench chuan Jantar Mantar-a nawrh huaiahawtten awm lailawkna an siam chawp te, loud speaker leh public address system an siamte chu dahbo vek turin a lo ti tawh a ni. NGT bench chuan nawrh huaihawt chu Air (Prevention and Control of Pollution) Act, 1981 bawhchhiatna a nih thu a sawi.