India rama Covid-19 kai zingah 2.23%-in an thihpui
India ramah hripui lengin ziaawm lam a pan thei lo a, nimina Ministry of Health and Family Welfare-in report a tihchhuahah chuan Covid-19 kai hmuh chhuah thar mi 48,513 an awm leh a, hei nen hian ram chhung hmun hrang hrangah hri kai hmuh chhuah 15,31,669 an awm tawh a ni.
Nimina report an tihchhuahah hian darkar 24 chhungin dama puan mi 35,286 lai an awm a, hri kai enkawl dam 9,88,029 awm tawhin vawiin lamah hi chuan nuai 10 chuang dama puan an awm tawh a rinawm. Enkawl dam tawh rate pawh a sang tawh hle a, 64.51% a tling tawh a ni. Hri kai mek 5,09,447 an la awm.
Darkar 24 chhungin hripui thihpui mi 768 lai an awm leh a, India ram hmun hrang hrangah Covid-19 vanga thi mi 34,193 an awm tawh a ni. Thihpui tawh hi tam hle mah se hri kai tawh zawng zawnga 2.23% chiah an ni thung.
Ni khatah sample 4,08,855 an endik. Indian Council of Medical Research (ICMR) chuan nimina report an tihchhuahah sample 4,08,855 an endik tih an tarlang. Ni hnih chhung a zawnin ni khata Covid-19 sample nuai nga chuang an endik hnuah niminah khan tlemin an endik zat hi a tlahniam leh deuh a ni. Hri len ṭantirh aṭanga nimin thleng khan sample 1,77,43,740 an endik tawh.
Ramchhung hmun hrang hrangah Covid-19 sample endikna atan laboratory pawmpui 1316 an nei tawh bawk a, heng zinga 906 hi sorkar laboratory a nih laiin 410 chu private laboratory a ni thung. India ramah hian Real-Time RT PCR hmanna laboratory 675 a awm a, 537-ah chuan TrueNat Test kalpuiin 104-ah CBNAAT test an kalpui bawk.