India ramah sakei a tam ber

Union environment minister Prakash Javadekar chuan Thawhlehni khan All India Tiger Estimation- 2018, 4th edition chu a tlangzarh a, kum 2014-18 chhungin India ramah sakei 741-a an pun thu leh khawvela sakei awm zawng zawng 70% chu India ramah an awm thu a sawi. 

India-a sakeite chu humhalh a nih theih nan zone ngaah ṭhen a ni a, chungte chu - Shivalik Hills and Gangetic Plains Landscape, Central Indian Landscape and eastern ghats, Western ghats Land­scape, North East Hills and Brahmaputra plains Landscape leh Sunderbans zone-te an ni. Kum 2014 khan heng zone pangaah hian sakei 2,226 a awm a, kum 2018-ah chuan 2,967 ah an pung tawh a ni. 

Report-a tarlan dan chuan Shivalik Hills and Gangetic Plains Landscape-ah hian kum 2014 khan sakei 485 awmin, kum 2018-ah chuan sakei 646 an awm tawh a ni. Central Indian Landscape and eastern ghats zone-ah hian kum 2014-a sakei 688 awm chu 2018-ah 1033, Wester ghats Landscape-ah 2014-a sakei 776 awm chu kum 2018-ah 981, North East Hills and Brahmaputra plains Landscape-ah 2014 khan sakei 201 awm chu 2018-ah 219 leh,

Sunderban-a kum 2014-a sakei 76 awm chu kum 2018-ah 88 ah an pung tih a tarlang. Chhiarpui hnuhnung berah India ramah sakei awm zat chu 2,967 an tling ta a ni.