RS member aṭangin Sharad Yadav leh Ali Anwar ban

Vice President M Venkaiah Naidu, Rajya Sabha chairman ni bawk chuan Thawhṭan zan khan Janata Dal-United hruaitu hel, Sharad Yadav leh Ali Anwar te chu Parliament upper house member an nihna aṭangina ban.

Rajya Sabha chairman chuan JDU in an party hruaitu pahnihte hi party lakah helin, party inkaihruaina te an zawm duh loh vangin anmahniin party member an nihna aṭangin an inban a, eptu party-te thil buatsaihah te an tel nia a sawi chungchang chu a ngaihtuah hnuah, JDU-in Rajya Sabha member an nihna aṭanga ban tura a ngenna chu a remtihpui a ni.

Bihar Chief Minister, JDU hotu Nitish Kumar-an Grand Alliance hnuaiah Congress leh RJD nena an thawhdunna tihtawp a, BJP nen ṭangrual sorkar a siam avangin Yadav hi a lungawi lo hle a, eptu party te chu a thurualpui zui a ni.

Sharad Yadav hi nikum khan Rajya Sabha member atan thlan tlin niin, a term hi kum 2022-ah tawp chauh tur a ni. Anwar-a term hi nakum kumtir lama tawp tur a ni thung. JDU president hlui Yadav hi Gujarat-a assembly inthlan neih turah campaign-in a awm mek a, BJP paihthlak a nih theih nan a bei mek a ni.