Supereme Court-in Tahir Merchant tihhlum tur dansak

Kum 1993-a Mumbai khawpuia ṭum eng emaw zat bomb tihpuah chungchanga TADA court-in thi tura a chungthu a lo rel tawh, Tahir Merchant-a tihhlum hun tur chu Supreme Court-in a dan sak rih.

Chief Justice Dipak Misra, Justice Ashok Bhushan leh Justice MM Shantanagoudar awmna bench chuan Merchant-an thi tura hremna pek a khin letna hi ngaihtuahin, CBI hnenah Merchant-a ngenna siam chungchang hi a chhanna pe turin a hrilh a ni.

Mumbai TADA court hian September thla khan Merchant leh Feroz Abdul Rashid Khan te chuan Mumbai khawpuia bomb tihpuahnaa an inhnamhnawih avangin thi turin an chungthu a rel a ni. He pawikhawihnaa inhnamhnawih dang, Karimullah Khan leh Abu Salem-te chu damchhung tang tura hrem an ni thung.

Merchant hi Mumbai beih tuma phiarrutute nen hian Dubai-ah meeting te neiin, an awmna turte a ngaihtuahsak a ni. Hei bakah hian dan loa India rama ralthuam siamna factory dinna turin sum pawh a zawnkhawm pui nia puh a ni bawk.

Mumbai beihna thubuai ngaihtuahnaah hian Merchant chu pawikhawihna thlenna a bultumtu bera puhin thi turin a chungthu rel a ni a, India ram aṭangin Pakistan-ah ṭhalai eng emaw zat chu ralthuam hman dan zirtirin a tir a ni.

Kum 1993, March 12-a Mumbai khawpui hmun hrang hrangah ṭum 12 bomb tihpuahah hian mi 257 an thi a, midang 718 in hliam an tuar a ni. Hliam tuar zingah hian taksa lama rualbanloh phah pawh eng emaw zat an awm a ni.

Supreme Court chuan Merchant-a tihhlumna tur thupek hi a dansak rualin, TADA court thupek a khinna hi nakkum March 14-a ngaihtuah leh turin a ti.