Gujarat election : Congress-in manifesto tlangzarh

Gujarat assembly inthlan neih tur atan political party hrang hrangten campaign an bei ngawrh tawh hle a, Congress party chuan Thawhṭanni khan election manifesto a tlangzarh.

Congress party chuan assembly inthlanah hian an party chu sorkar siam tura thlan tlin anih chuan state chhunga ṭhalai hna neilote chu thla tin unemployment allowance, Rs 4,000 ṭheuh pek a tiam. Congress chuan BJP rorelna hnuaiah Gujarat leh rampum huapah pawh unemployment rate a sang chak hle tih sawiin, hna pawh a vang zawk niin a sawi.

Manifesto hi state Congress hotu Bharatsinh Solanki-an a tlangzarh a, state chhungah Patidars hnam chu special category hnuaia sorkar hna leh zirnaah reservation siamsak a tiam a, hemi chungchang ngaihtuahna tur bill hi state assembly-ah pharh a ni ang, a ti.

Patidars hnam hi BJP thlawptu nghet tak an ni ṭhin a, mahse tunhnaiah an hnam puala reservation an phut chungchangah rorellai, BJP sorkar nen an inkar boruak a ṭha lo chho a, hei vang hian Patidars hnam vote hi Congress lam chuan hui tumin ṭan a la mek ani. Patidars hnam hi an tam tham avangin assembly constituency 182 zinga 60-ah chuan an ṭan lam hian awmzia a neih phak hle rin a ni.

Gujarat-ah hian Congress party hian kum 22 zet ro an rel tawh lo a ni. State assembly inthlan hi December 9 leh 14 hian neih a ni dawn a, December 18-ah vote tlate chhiarin result puan nghal a ni ang.