Manipur-ah kum 56 mi Covid-19 vangin a thi
Manipur-ah nimin khan Covid-19 kai zinga pakhat, kum 56 mi chu Regional Institute of Medical Sciences (RIMS)-ah a thi a, an state-ah hripui vanga thi hmasa ber a ni.
RIMS medical superintendent Dr Ch Arunkumar Singh chuan an state-in Covid-19 vanga thi an neih hmasa ber hi Sapam Basanta Sinng a nih thu sawiin, Thoubal district-a Khongjom Sapam khuaa mi a ni a, July 22 khan kal ṭha lo leh hypertension vangin damdawiina enkawl tura lut a ni a, type-2 diabetes a nei bawk tih a sawi. Pathianni khan a sample test a ni a, a positive tih hriat a ni.
Dr Singh chuan RIMS-a Covid-19 vanga thi an awm tak avangin damdawiina thawkte leh damlo dangte pawh uluk taka screening neihpui leh an ni tih a sawi bawk. Manipur-ah hian Covid-19 kai hmuh chhuah tawh hi mi 2,317 an awm tawh a, an zinga 1,612 chu enkawl dam an ni tawh.
Thawhlehnia hri kai hmuh belh mi 31 zingah mi pakua chu hmun danga zin chhuahna nei lo an ni. Additional health director Dr K Sasheekumar Mangang chuan heng mite hian khawi aṭangin nge hri hi an kai tih chhui zui nghal a nih thu leh, midang an kai chhawn theih tura ngaihte pawh chhui nghal an ni thu a sawi.
State chhungah hri kai an pun zel avangin sorkar chuan hri kaite enkawlna tur a siam belh mek. Health minister L Jayantakumar Singh chuan Thawhlehni khan Imphal East district-a Manipur Trade and Expo Centre-a khum 300 awm theihna tur, Covid-19 Care Centre siam mek chu a endik a, he centre hi ni thum hnuah chuan hman theih a ni dawn tih a sawi. Hei bakah hian centre dang pathum pawh buatsaih mek a ni. Tunah hian hri kai enkawlna CCC hi 13 a awm mek a ni.