MCD inthlanah AAP-in kum 15 chhung Thuneihna changtu BJP a hneh

Municipal Corporation of Delhi (MCD) inthlanah Delhi-a rorellai, Aam Aadmi Party (AAP) an chak a, kum 15 zet MCD-a thuneihna changtu, BJP lalna an tihtawp sak ta.

December 4 khan MCD ward 250-ah inthlan hi neih a ni a, hei hi MCD-te chhunfin an nih hnua inthlan buatsaihna hmasa ber a ni. Vote nei mi vaibelchhe 1.45 zingah nuai 73 velin vote thlakin, vote tla hi 50.48% chauh a ni pha. Ward 250 awmnaah hian rorelna chang turin ward 125-a chak a ngai a ni.

Arvind Kejriwal-a kaihhruai AAP hi ward 134-ah an chak a; hneh theih loh nia ngaih hial, kum 15 zet civic body-a rorelna changtu BJP chuan ward 104 an la a, Congress-in ward pakuaah hnehna an chang ve bawk.

Kum 2017-a civic body inthlanah khan municipal ward hi 270 awmin, BJP chuan ward 181 an la a, AAP hian 48 chauh la phain, Congress chu pathumnaah awmin ward 30 an la a ni.

AAP hian inthlana BJP rorellai an paihthlak ṭum khatna a ni a, Delhi assembly inthlana an chak khan rorellai Congress an paihthla a, kumin kumtir lama Punjab assembly-ah khan rorellai Congress an paihthla bawk. Hemi chungchang hi sawichhuakin, party hruaitu Sanjay Singh chuan, "BJP chuan AAP-in Congress party chauh a hneh thei tiin an sawi fo a, vawiinah Arvind Kejirwal chuan an thusawi chhanna hi a pe ta a ni," a ti.

Kejriwal chuan Delhi mipuite hnenah lawmthu sawiin, Delhi mipuite chuan MCD enkawl turin an fapa, an unaupa ngei an thlangchhuak a ni, a ti. Delhi chu khawpui fai leh mawi taka siam turin an vaia hma an lak a ngaih thu a sawi nghal bawk.

Kum 24 liam ta chhung hian BJP hian Delhi-ah sorkarna siam thei lo mah se, Congress leh AAP sorkar laiin MCD-ah hian kum 15 zet thuneihna a chelh thei thung. Kum 2015-a Delhi assembly inthlana hneh taka AAP thlan tlin an nih hnu kum hnih, 2017-a MCD inthlanah pawh khan BJP hian an thuneihna hi an la hum thei a ni. Tun ṭum MCD inthlanah pawh hian ṭan an la nasa leh hle a, prime minister Narendra Modi bakah union minister leh BJP chief minister hrang hrangte an campaign a ni.

Congress party chu kum 2014 aṭang khan Delhi-a an dinhmunin hniam lam a la pan zel a, hetichung hian tun ṭum MDC inthlan hi party chuan a ngaih pawimawh ber zingah a dah tel lo a, an campaign nep hle. Bharat Jodo Yatra nei mek, Rahul Gandhi pawh Delhi-ah hian a campaign lo a ni.