Punjab-ah nausen hralhtu leh leitu mi 7 man

Punjab police-te chuan Thawhlehni khan nausen piang hlim hralh leh leitu nia puh mi pasarih an man a, an zingah hian hmeichhia pahnih an tel. Nausen, ni thuma upa pahnih an chhanchhuak a, an mi mante kut aṭangin pawisa fai, Rs nuai 4 an man tel bawk.

Patiala superintendent of police, Varun Sharma chuan thu an dawn bawhzuiin police team hian nausen hralh tumtu pawl, mi parukte leh a leitu mi pakhat an man tih a sawi.

Sarma chuan nausente hi chhungkaw rethei tak takte hnen aṭangin rukbo leh leisak an ni fo ṭhin tih sawiin, Rs 50,000 ten an leisak a, fa neilo nupa hnenah Rs nuai 4-5 ten an hralh leh ṭhin tih a sawi. 'Sadarma Samana police station-ah thubuai ziahluh nghal a ni a, uluk takin chhui chian mek an ni. Hemite pawl hi Punjab bakah ṭhenawm state-ahte an chetla ṭhin tih hriat a ni," a ti. He pawl hian nausen hmanga an sumdawnna kalpuina atan mite rinhlelh an kai loh nan an SUV pawh ambulance-ah an let tih a sawi. An motor pawh hi an mansak bawk a ni.