Odd-even scheme-ah ngaihnathiamna siam tum lo

Delhi sorkar chuan khawpui chhunga boruak bawlhhlawh tihziaawmna tura a hmalak tumna a thehchhuah, motor number kawpkim leh kawpkim lo inthlanchhawk tirna, Odd-even scheme hnuaiah tum lakah mah ngaihnathiamna siam loh a rawt.

Delhi sorkar hian National Green Tribunal-ah a ruahmanna siam hi a thehlut a, khawpui chhunga in sak hna thawh pawh air pollution level-in 'severe category' a thlen chuan tihtawp vek te, pawn lam aṭanga Delhi khawpui chhunga motor lian, truck tlan luh khapte a tel.

NGT hian pollution level sang zel tihziawm a nih theihna atan a hma lak tum dante thehlut turin a lo hriattir tawh a, Uttar Pradesh, Haryana leh Rajasthan pawhin tribunal-ah hian an ruahmanna siamte an thehlut tawh a ni. Delhi sorkar hian thehlut mai loin, hun pek belh turin a dil a, hei vang hian NGT chuan a khak a, Nilaini khan a thehlut ve chauh a ni.

Delhi sorkarin boruak bawlhhlawh tihziawmna tura odd-even scheme kalpui a tumah, hmeichhe driver leh two wheeler-te bakah sorkar official-te chu huam tel tir a tum loh avangin NGT hian a sawisel a, hei vang hian November thlaa he scheme hman a tum pawh a ṭhulh phah a ni. NGT chuan ngaihthiam bik nei chunga he system kalpui hi a dik lo tiin a sawi.

Kum 2016 khan Delhi sorkar chuan odd-even scheme hi ṭum hnih a lo enchhin tawh a ni.