Aadhaar thlunzawm hun March 31 thleng pawtsei

Sorkar laipui chuan nimin khan Supreme Court hnenah sorkar hnuaia service leh welfare scheme hrang hranga hamṭhatna dawng thei tura Aadhaar thlunzawm hun a siam chu nakkum March 31 thleng atan pawhsei a nih thu a hrilh.

Hemi chungchanga hriattirna pawh hi vawiin hian sorkarin a tichhuak dawn tih a sawi bawk.

Sorkarin service hrang hranga hamṭhatna dawng tura aadhaar number neih ngei a ngai tia sawi chungchang khin letna petition chu court-ah hian eng emaw zat thehlut a ni a, petition thehlutute chuan Aadhaar neih ngei ngai nia sorkar thupek chu dansak turin court hi an ngen a ni.

Chief Justice of India Dipak Misra chuan judge panga awmna constitution bench chuan karleh hian Aadhaar lo dang lailawk tura ngen chungchang hi ngaihtuahin, thutlukna pawh an siam dawn niin a sawi.

Hetih lai hian attorney general KK Venugopal chuan Aadhaar hi kum eng emaw zat kalpui a nih tawh avangin lo dan theih a ni ngawt lo tih a sawi a, hemi beilet tur hian sorkar pawh a inpeih a ni, a ti.

Attorney general chuan sorkar service leh scheme hnuaia hamṭhatna dawng tura Aadhaar thlunzawm hun tur chu nakkum March 31 thleng pawhsei a nih thu a sawi rualin, mobile service nei tura mobile number nena thlunzawm hun ruat, nakum Febuary 6 thleng tih erawh tihdanglam a nih loh thu a sawi.