Gujarat assembly : Campaign hun a tawp ta

Gujarat assembly inthlan thawh khatna chu December 9 hian neih a ni dawn a, nimin tlai khan inthlan thawh khatna tura campaign hun a tawp.

Inthlan thawh khatna hi assembly bial 182 zinga seat 89 ah neih a ni dawn a, candiate 977 an awm. December 9-a inthlanna neih tura candidate zingah hian Chief Minister Vijay Rupani pawh a tel. Inthlanna thawh hnihna hi December 14-ah neih a ni ang.

Gujarat-a inthlan neih tur atan hian party hrang hrangte an campaign ngawrh hle a, Prime Minister Narendra Modi leh Congress hruaitu Rahul Gandhi-te pawhin ṭum eng emaw zat rally an huaihawt a ni. Anni bakah hian BJP tan party president Amit Shah, union minister Rajnath Singh, Nirmala Sitharaman-i bakah Uttar Pradesh CM Yogi Adityanath, Rajasthan CM Vasundhara Raje leh Madhya Pradesh CM Shivraj Singh Chouhan-te an kal a, Congress tan prime minister Manmohan Singh, union minister hlui P Chidambaram, Jyotiraditya Scindia leh Sachin Pilot-te an campaign bawk a ni.

Inthlan thawh khatna neihna tur zingah Surashtra leh Kutch bialte chu seat tamna a nih avangin he biala chak hi a pawimawh hle tura ngaih a ni. Politics lama zirchiangtute chuan Saurashtra leh Kutch bial chhunga chakte chu sorkarna siam thei tura ngaih an nih thu an sawi. Saurashtra hi Arabian Sea kamah awm niin, district 11 a huam a ni. Kutch hi district lian ber a ni a, he district chhungah hian taluka 10, khaw 939 leh munipality paruk a awm.

Kum 2012 assembly inthlanah khan BJP chuan Saurashtra leh Kutch biala chhunga assembly seat 58 zingah seat 35 an la a, Congress-in seat 20 an la a ni. Kum 2007-ah khan BJP leh Congress chuan set 43 leh 14 an la bawk.