Congress-in Mani Shankar Aiyar a suspend

Congress party chuan an party senior leader Mani Shankar Aiyar chu Prime Minister Narendra Modi-a chungchang mawi lo taka a sawi avangin party member a nihna aṭangin a hrem a, insawifiah turin hriattirna a pe nghal bawk.

Union Minister hlui, Aiyar hian PM Modi-an Ambedkar Intenational Centre a hawn ṭum a, Congress party-in Ambedkar ropuina an ngaihthah nia a sawi chungchang a chhanletnaah, PM chu mi nun hniam, neech (mi hnuaihnung) tiin a sawi a ni. He ṭawngkam a hman avangin a lakah party hruaitute an lungawi lo a, party member a nihna aṭangin an suspend ta a ni.

Congress vice president Rahul Gandhi chuan Aiyar chungchang hi a twitter-ah pawh a tarlang a, "BJP leh PM chuan ṭawngkam mawilo tak takin Congress party an bei fo a ni. Mahse Congress chuan kalphung hran a nei thung. Mani Shankar Aiyar-an PM chungchang a sawinaa a ṭawngkam hman hi ka duh lo a ni. Kei leh Congress party chuan a thusawi avang hian thupha chawi turin kan phut a ni", a ti.

Rahul Gandhi-an a chungchang a sawichhuah hnuah, Aiyar pawhin a ṭawngkam hman avang hian pawi a tih thu a sawi nghal bawk. Aiyar hi a insawifiah nghal a, ' Neech tia ka sawi hi 'low level' ka sawi tumna a ni, a ti. 'Low life' tihna anga mi tam takin an pawm zawk avangin thupha hi a chawi a ni. Hindi hi ka motor tongue a ni lo a, Hindi-a thu ka sawi dawn pawhin English in ka ngaihtuah hmasa ṭhin a ni. Awmze dang a lo nei a, PM hnam chungchang ka sawi tumna a ni lo, a pawi ka ti hle mai", tiin thupha a chawi.