HM-in khawchhak state-te inring turin chah

Union Home Minister Rajnath Singh chuan khawchhak lam state-te chu Indo-Bangla border kaltlanga Rohingya Muslim leh dan loa pem luh tumte dang tura inring reng turin a chah.

Rajnath Singh hian Kolkata-ah West Bengal, Assam, Mizoram, Meghalaya leh Tripura chief minister leh senior official-te a kawm a, ramri katlanga dan loa luh tumte ven hna uluk leh ngawrh zawka kalpui a ṭul thu a sawi. Minister chuan Naxal hel hluarna biala venhim hna thawk tura din, Unified Command ang chi chu khawchhak bialah pawh din a nih tur thu sawiin, Border Protection Grid (BPG) tih an ni dawn tih a sawi. Singh chuan BJP chuan khawchhak lam ramri bula state hrang hrangte thawhpuiin, ramri kaltlanga dan loa luh tum, Rohingya Muslim te tiamin an lo dang thei dawn a ni, a ti.

BPG hian Indo-Bangladesh border, km 4,036 thui venhim hna an thawk dawn a, BPG hnuaiah hian division hrang hrang siamin physical barriers, non-physical barriers, surveillance, system, Intelligence agencies, state police, BSF bakah state leh central agency dangte pawh an tel dawn a ni.

Minister chuan dan loa pem luh tumte ven bakah, firfiak rawn luh tumte lo dang turin a bik taka ruahmanna siam ani ang, a ti. Hei hi khawchhak lam state leh central sorkar te an ṭanrual chauhin a hlawhtling thei dawn a ni, a ti bawk.

West Bengal Chief Minister Mamata Banerjee-i chuan Home Minister hmalaknate chu ṭha a tih thu sawiin, joint operation neihna tura theihtawpa puih zel a intiam a ni.

Hmarchhak state Assam, Meghalaya, Tripura leh Mizoram hi Bangladesh nen an inri a, ramri km 1538.220-a thui zingah km 327.22 chu hung loh a la ni. Myanmar ramri hi km 1643-a thui a ni bawk.