Gujarat-ah candidate 101 in criminal case nei

Gujarat Assembly inthlan thawh khatna chu nimin khan neih a ni a, boruak ṭha tak hnuaiah vote thlak a ni. Inthlan thawh hnihna hi December 14 hian neih leh a ni ang.

Inthlan thawh hnihna, assembly bial 93-a neih tura candidate zingah 101 chu thubuai neilai an ni a, an zingah hian thubuai rip tak tak - pawngsual, tualthah leh inrukbo thubuai neite an awm. Gujarat Election Watch leh Association for Democratic Reforms (ADR) chuan candidate-te affidavit thehluhte a zirchiang a ni. Candidate 851 zingah 822 te affidavit zirchian a ni a, thubuai 101 zingah mi 64 chu thubuai rip tak nei an ni. Candidate 29 te affidavit kimchang erawh ECI website-ah dahchhuah a ni lo.

Party lian zingah BJP party candidate 86 zinga 13, Congress party candidate 88 zinga 18, Bahujan Samaj Party (BSP) candidate 74 zinga 2-te chu thubuai rip tak nei lai an ni.

Candidate zingah hian mi hausa tawntaw, cheng vaibelchhe nei tling crorepati 199 an awm a, an zingah vaibelchhe nga nei tling 66 an tel. Hetihlai hian mahni pual sum nei lo candidate pali an awm thung.