Ayodhya-a Ram temple a din nan Hindu-ten bei dawn

Bharatiya Janata Party (BJP) hotu Tapan Bhowmik chuan Ayodhya chungchanga Hindu leh Muslim te inkar buaina awm chungchang relfelnaah, Supreme Court chuan Hindu-te duhdan anga a relfel ngei a beisei thu a sawi. Hemi rual hian court thutlukna chu eng ang pawh ni se, Hindu-te chuan Ram temple a din ngei theih nan an bei dawn a ni, a ti.

Tapan chuan ramchhunga Hindu vaibelchhe tel awmte chuan Ayodhya-ah hian temple hi an dintir ngei dawn niin a sawi. Hei bakah hian Lok Sabha-a an hruaitute pawhin Ayodhya-a Ram temple awmna ṭhinah ngei temple hi din thar leh anihna turin an bei dawn a ni, a ti.

Ayodhya-a temple leh mosque din chungchanga buaina hi kum 1949 khan local court-ah ngaihtuah a lo nitawh a ni. Kum 2010 September thla khan judge pathum awmna, Allahabad High Court bench chuan Ayodhya ram inchuh, acre 2.77-a zau chu hmun pathumah a ṭhensak a ni. Hmun pakhat chu Hindu Maha Sabha hnenah pek niin, pakhat chu Nirmohi Akhara hnenah a pe a, Islamic Sunni Waqf Board hnenah pakhat a pe bawk.