Gujarat leh HP inthlan result : BJP-in Gujarat-ah record siam; HP-ah Congress sorkar dawn

Gujarat leh Himachal Pradesh assembly inthlana vote tlate chu nimin khan chhiarin, result puan a ni.

Gujarat :

Gujarat-ah chuan BJP hian seat lak tam lamah record thar siamin, a zawna a term sarihna turin sorkarna an siam leh dawn. MLA thlan tharte hi kar leh Thawhṭanniah rinawmna thu tiamtira lakluh an ni ang.

Seat 182 awm, Gujarat Assembly-a party malin seat a la lak hnem ber record chu kum 1985 inthlana Congress-in seat 149 an lak kha a ni. Mahse kumin inthlanah BJP hian rawn lehpelin, seat 156 zet lain record thar an rawn siam a ni.

Congress leh Aam Aadmi Party (AAP) chuan thawm nei ve viau mah se BJP an pha lo hle. Congress hian seat 17 lain, kum 2017 inthlana a seat lak zat aiin 61 zetin a tlahniam. AAP chuan an beisei ang pha lo viau mah se, a ṭum khatna atan Gujarat Assembly-ah an tel ve thei dawn ta a, seat 5 an la.

Prime minister Narendra Modi leh union home minister Amit Shah-te chuan Gujarat chief minister Bhupendra Patel chu record siam thei khawpa BJP a chakpui vangin lawmpuina an hlan. Patel hi CM-ah a awm chhunzawm dawn a ni.

Himachal Pradesh :

Himachal Pradesh-ah Congress party chuan rorellai BJP an hneh a, sorkar thar an siam dawn. He state-a hian kum 40 dawn chu BJP leh Congress party hi an in sorkar chhawk a, party pahnihte hi a zawnin term hnih an la sorkar ngai lo thung.

Seat 68 awmna Himachal Pradesh assembly-ah hian Congress party hian seat 40 lain, kum 2017 inthlan aiin seat 19 in an la tam zawk. Rorellai BJP chuan seat 25 an la a, an seat 19 an hum zo ta lo a ni.

Congress party chuan BJP-in a party MLA thlan tharte an thlem leh lei tur laka veng turin, MLA tharte hi Congress sorkarna state, Chhattisgarh lamah an awmtir hrih dawn tih an sawi nghal. BJP hian independent candidate tlingte chu a be tawh nia sawi a ni bawk.

AAP chuan a ṭum khatna atan Himachal Pradesh-ah hian candidate siam ve mah se, chak zo an awm lo.

AAP-in 'national party' status nei thei dawn

Gujarat assembly inthlanah Arvind Kejriwal-a kaihhruai Aam Aadmi Party (AAP) chu an beisei angin che ṭha lo mah se, Assembly seat panga an la pha a, hei vang hian 'national party' status an nei thei tawh dawn.

National party status nei thei tur hian political party hi state pali ah tal recognised an nih an ngai. State party ni tur hian Assembly inthlanah seat pahnih leh vote share 6% an neih a ngai. AAP hian Gujarat-ah hian seat 5 lain, an vote share hi 12% a tling a ni.

National party ni thei tur hian criteria dang a awm bawk a, chu chu state pathumah telin Lok Sabha seat 2% an neih phak a ngai a, an seat neih ngai zat hi 11 a ni. AAP hian Lok Sabha MP erawh an la nei lo a, an MP pahnih Raghav Chadha leh Sanja-te hi Rajya Sabha member an ni thung.

AAP hian Delhi leh Punjab-ah sorkarna an siam mek a, Goa inthlanah khan vote tla 6% leh seat hnih an la pha a, Gujarat-ah an phak leh tak avangin national party an ni thei dawn ta a ni.

Election Commission of India-in a national party atana a pawm hi political party pariat chiah an la awm. Chungte chu - BJP, Congress, National People's Party (NPP), Trinamool Congress (TMC), National Congress Party (NCP), Communist Party of India (CPI), Communist party of India-Marxist (CPM) leh Bahujan Samaj Party (BSP) te an ni.