SCC exam Hindi chauhah buatsaih tumna a awm lo

Sorkar laipui chuan Staff Selection Commission (SSC) recruitment exam Hindi chauha buatsaih tumna leh, hemi atana rawtna pawh a awm lo tih a sawi.

Minister of state for home affairs Ajay Kumar Mishra chuan nimina Rajya Sabha rorel inkhawmah CPI(M) MP AA Rahim zawhna chhangin, " SSC examination hi Hindi leh English-in buatsaih a ni ṭhin. Mahse paper II (Multi-Tasking [non-technical]) chu Constitution-a Eight Schedule-a tel ṭawngin chhan theih vek a ni thung. Hindi chauh hmang tura rawtna hi a awm lo," a ti. Eight Schedule-ah hian ṭawng chi 22 an tel.

Media report ṭhenkhatah union home minister Amit Shah-a'n September thlaa president Droupadi Murmu hnena Committee of Parliament on Official Language report a thehluhah, zirna in - Kendriya Vidyalaya, IIT leh Central University-ahte medium of instruction-ah Hindi ṭawng hmang ngei ngei tur leh, government recruitment exam-ah English paper pawh Hindi-a thlak turin an rawt niin an tarlang a ni. Hemi chungchanga zawhna chu nimin khan Minister hian a chhang a ni.