UP sorkarin private school-te fee lak dan tur siam dawn

Uttar Pradesh sorkar chuan acamedic session lo awm tur aṭangin, an state chhunga private school hrang hrangte fee lak dan tur kaihhruaina dan a siam dawn.

Department of Secondary Education chuan hemi atan hian Uttar Pradesh Self-Financed Independent Schools (Regulation of Fees) Bill 2017 draft a duang tawh a, an website-ah dahchhuakin, nu leh pa, school neitute leh mipui nawlpuite aṭangin an ngaihdan leh rawtna hrang hrangte thehlut turin an ti a ni.

Fee lak dan chungchanga rawtnate chu December 22 thleng thawn theih a ni ang.

UP Secondary Education Board, CBSE, ICSE leh board dang hnuaia school inziaklutte bakah, sakhaw pawl bil school te pawh he dan thar hian a huam tel vek dawn a ni.

Deputyy Cheif Minister Dinesh Sharma chuan state sorkar chuan fee lak dan tur ruahmanna fel tak a siam bakah hian fee pek danah pawh langtlanga thil kalpui a duh a ni, a ti. Supreme Court chuan state sorkar tin hnenah school hrang hrangte fee an lak dante chu enfiah turin a lo ti tawh a ni, tiin a sawi bawk.

Sharma chuan kumtin private school-te chuan fee an tisang a, an zirlai neih sa, pawl sawn tura an promote te hnen aṭang pawhin admission fee an la leh a, hei bakah hian zirlaite chu thawmhnaw, bag, lehkhabu leh hmanraw dangte chu school aṭangin emaw, dawr bik an siam aṭang emawin lei tura hriattir an ni bawk a ni, a ti. Session laklawh laiin school ṭhenkhat chuan fee tisangin, program hrang hrang an siamah zirlaite chu sum an chawitir fo a ni,a ti.

State sorkar hian fee lak dan tur ruahmanna hi a siamfel hunah, zonal fee regulatory committee chuan school-in fee an lakdante hi an enfiah ṭhin dawn a ni.

Haryana, Gujarat, Maharashtra, Tamil Nadu leh Delhi-te chuan private school-a fee lak dan tur dan hi an lo siam tawh a ni.