Pakistan-in Prime Minister puhna chhang

Prime Minister Narendra Modi-an Gujarat assembly inthlan neihna tur atana campaign-naah Pakistan chu a inrawlh nia a puh bakah, Congress party hruaitute leh Pakistan palaiten a rukin meeting an nei nia a puhna chu Pakistan chuan a chhang let.

Pakistan Foreign Office thupuangtu, Mohammad Faisal chuan PM-in a puhna chu thu belhchian dawl lo leh awihawm lo tak a ni tih sawiin, India politician-te chuan an ram politics thilah Pakistan chu hnuk lut lo se a duh thu a sawi. Inthlan kaihhnawihah Pakistan inrawlh anga puha dawt phuahchawp mai loin, anmahni chakna hmang ngeia inthlana chak tum zawk turin a ti a ni.

PM Modi hian Pathianni-a election rally-a thu a sawiah, Pakistan-in Gujarat inthlanah inrawlh a tum thu hi a sawilang a ni. Hemi hma hian Congress hruaitu ṭhenkhat chuan Pakistan palaite nen a rukin meeting an nei tih a lo sawi tawh bawk.

Congress party pawhin PM puhna hi chhangin, hetianga dawt phuahchawp hmanga mi puh chu Prime Minister office luahtu dinhmun nen a inmawi lo tih an sawi. Pakistan palaite nen meeting neih hi a ruka kalpui ni loin, he hunah hian journalist-te pawh an tel a ni, a ti. Congress hruaitu Surjewala chuan PM thil ngaihtuah dan chu a dinhmun nena ngaihtuahin pawi a tih thu a sawi a, India mipui leh Congress aiawhin a thusawi duhdan hi a dinhmun, kum leh tawnhriat lo neih tawhte nen an inawm lo hle tih a hrilh duh niin a sawi.