China-in Doklam-ah sipai 1800 dah

Tun hnaia India leh China sipaite inepna, Bhutan tri-junction bula Doklam bialah China chuan sipai 1800 vel a dah nia sawi a ni a, hei hi Defence Ministry lam chuan a ngaimawh hle rin a ni bawk.

The Times of India-in a tarlan danin, China hian ramri bulah hian helipad pahnih a siam mek a, thlasik laia sipaite awmna tur leh an mamawh chhekkhawlna hmun pawh a siam a ni. He thil hiChina sipai, People's Liberation Army (PLA) ten Doklam-ah awmhmun sawhngheh an tumzia lantirna anga ngaih a ni.

Kumin June 16–August 28 chhung khan China sipaiten Doklam area-ah kawngpui siam an tum vangin India leh China sipaite hi Doklam bialah hian an lo inep tawh a ni. Ram pathumte inri-na lai hmun hi India chuan Doka La tiin a vuah a, Bhutan-in Doklam tiin a vuah thung. Hetihlai hian China chuan helai hmun hi a ram chin, Donglang bial huam niin a sawi a, Bhutan chuan Doklam area hi a ram chin niin a chhal bawk.

India leh China aiawhte hi an inbiak hnuah August thla tawp khan Doklam bial aṭanga an sipaite lakkir hi an remti a ni.