Bail dilna phalsak a nih hnuah TMC hruaitu man leh nghal

Trinamool Congress (TMC) thupuangtu Saket Gokhale chu Gujarat-a Morbi lei chim chungchangah a twitter-ah a thu post avanga man a nih hnuah, Ningani kha Ahmedabad-a magistrate court chuan bail a dilna a remtihsak. Mahse a bail dilna phalsak a nih hnu lawkah Mobri police-te chuan case dangah an man zui leh nghal.

Chief metropolitan magistrate M V Chauhan chuan police custody-a a awm hun zawh hnua Ningani-a court-a Gokhale a inlan ṭumin bail a dilna chu phalsak a ni. Mahse hemi hnu hian Morbi police-te chuan Gokhale hi thubuai an siamsak dang hmangin an man zui leh nghal tih Assistant Commissioner of Police (Cyber Crime) Jitendra Yadav chuan a sawi.

He thil thleng vang hian TMC chuan Morbi-ah hian a party aiawh, mi pathum an tir ve nghal bawk. TMC chuan BJP agenda tenawm tak chu Gujarat-ah kalpui a ni leh ta nia sawiin, chhan mumal nei loin Gokhale chu an man leh nghal tih an sawi. BJP rorelna hnuaiah mipuite democratic rights chu dinhmun derthawng takah a awm tawh a ni tiin, Gokhale chu chhuah nghal tura an phut thu an tarlang.

Gujarat-a Morbi lei chim vanga mi 135 chuang thihna a thlen hnuah, Gokhale hian December 1 khan a twitter-ah PM Narendra Modi-a'n Morbi khua a tlawhna atan Rs vbc 30 sen a nih thu, RTI hmanga zawhchhuah nia tarlanna news clip chu a tarlang a ni. Mahse a hnuah Press Information Bureau chuan he information hi thu dik lo a nih thu rawn tarlangin, Gokhale chu thu dik lo a post avangin a lakah FIR thehluh a ni a, December 6 khan man a ni.