Dec 12-ah Gujarat CM thar atan Bhupendra Patel lalut dawn

Gujarat assembly inthlan neih zawh takah rorellai, BJP chu hneh taka thlan tlin an ni a, Bhupendra Patel chu December 12 hian a ṭum hnihna atan Chief Minister atan lakluh a ni dawn. A rual hian a cabinet minister turte pawh lakluh nghal an ni ang.

BJP hian inthlanah hian seat lak hnem lamah record siamin, seat 182 awmna Assemmbly-ah seat 156 a la pha a ni. Kum 1985 inthlana Congress-in seat 149 laa record a lo siam tawh chu a rawn khum a ni. A ṭum sarihna atan BJP chuan sorkarna an siam leh dawn a ni.

December 12-a CM thar lakluh inkhawm hi prime minister Narendra Modi leh union home minister Amit Shah-te pawhin an telpui dawn a ni.

Kum 60 mi, CM Bhupendra Patel leh a cabinet minister-te chuan sorkar thar dinna tur kawng hawngin nimin khan governor Acharya Devvrat hnenah banna an thehlut a, Governor pawhin an banna hi a lo pawmsak nghal a ni. Sorkar thar lakluh a nih hma chu Patel hi caretaker CM-in a la awm chhunzawm ang.

Sorkar thar lakluh inkhawm hi Gandhinagar-a Helipad Ground-ah neih a ni dawn tih Gujarat BJP chief C R Paatil chuan a sawi.

HP Congress MLA tharten CM tur thlang
Himachal Pradesh inthlanah Congress party chakin, BJP sorkar an thlak dawn a, nimin khan Congress Legislature Party hruaitu tur thlangin party MLA thlan tharte chuan Shimla-ah meeting an nei.

Congress hian member 68 awmna Himachal Pradesh assembly-ah seat 40 an la a, BJP-in seat 25 lain, independent candidate pathum thlan tlin an ni bawk.

Assembly inthlan dawnah Congress party hian chief minister candidate a siam lawk lo. Chief minister atana rinkai ber chu state party president Pratibha Singh a ni a, ani bakah party president hlui Sukhwinder Singh Sukhu leh CLP leader kalchhuak Mukesh Agnihotri-te hming pawh sawi lan a ni.