Zing dar 6 leh zan dar 10 inkarah condoms fakna tihchhuah khap

Sorkar laipui chuan TV channel hrang hrangte hnenah, condoms fakna chu zing dar 6 leh zan dar 10 inkarah tichhuak lo turin a hriattir a, a chhan chu naupangte en atana mawi lo niin, nghawng ṭha lo zawk a thlen a hlauhawm thu a sawi.

Ministry of Information and Broadcasting chuan TV channel ṭhenkhatin naupangte en atana mawi lo, condoms fakna an tichhuak fo tih a hriat thu sawiin, hei vang hian khuahkhirhna khauh zawk a siam ta a ni.

Cable Television Networks Rules, 1994 chuan naupangte himna atana tiderthawng thei thil leh, naupangte rilru-a thil ṭha lo tuh thei advertisement tihchhuah a khap a ni. He thupek behchhan hian, TV channel zawng zawngte chu kum bihthliah chin tana tih leh naupangte en atana mawi lo, condoms fakna hi naupangten TV an en hunlaia tichhuak lo tura tih an ni. Hei bakah hian advertisement dangah pawh ṭawngkam mawi lo, zahawm lo leh huatthlala lam chite hmang lo tura tih a ni bawk.

Condoms fakna hi naupangten an hmuh lohna turin zan dar 10 leh zing dar 6 inkarah chauh tihchhuah tur a ni a, he dan zawmlote chu dan anga hrem theih an ni ang.

September thla khan Surat-ah Sunny Leone lanna condom advertisement duh lohna lantir a lo ni tawh a, he advertisement hi khawpui chhung hmun hrang hrangah tar a ni a, hei hi Hindu pawl, Hindu Yuva Vahini chuan duh loin, adverstisement an tarna hmun pakhatah lungawi lohna an lantir tawh a ni.