Parliament rorel neih zat tur party-ten sawiho a ngai : Naidu

Vice President M Venkaiah Naidu chuan political party hrang hrangte chuan Parliament rorel inkhawm neih chungchangah a neih zat tur bihthliah a ngai em tih an sawiho a ngai a ni, a ti. Hei bakah hian House chhungah president officer podium bula member kalkhawmte hremna pek nghal zel a rawt bawk.

Kumina Parliament Winter Session neih turah Vice President hian a ṭum khatna atan Rajya Sabha rorel inkhawm chu chairman a nih angin a kaihruai dawn a ni. Naidu chuan rorel inkhawm tibuai ṭhin member-te chu mipui vantlang hriata an hming puanzar ṭhin a rawt a ni.

Vice President hian rorel inkhawm tluang leh ṭha taka neih a nih theihna turin rawtna 10 a siam bawk a, mipuiten rorelna in sang ber an zahna chu vawnnun zel a ngai a ni, a ti. Rawtna

ṭhenkhat awmah chuan Parliament rorel inkhawm hi kum khatah ni 100 tal neih rawt a ni a, hei hi political party-te chuan uluk taka an ngaihtuah a ngai a ni, a ti.

Venkaiah Naidu chuan state assembly-ah rorel inkhawm neih tlem chungchang pawh a sawichhuak a, State assembly-te chu chawhrualin ni 29 vel rorel inkhawm nei ang a ni a, meeting neih zat hi a tlahniam zel niin a sawi bawk. Heng meeting neih ṭhenkhat chu eptu lamin an la boycott zui bawk a ni, a ti.

Naidu chuan kum 2010, March 9-a Rajya Sabha-in a pass tawh, women reservation bill chu Lok Sabha leh assembly-ten pass ve tawh ngei se a duh thu a sawi bawk.

Vice President chuan Lok Sabha hmasa ber, kum 1952-57 chhung khan rorel inkhawm ṭum 677 neih niin, bill 319 pass a nih thu a sawi. Hetih lai hian Lok Sabha 14-na, kum 2004-2009 inkarah khan rorel inkhawm hi ṭum 332 neih niin, bill 247 pass a ni a, Lok Sabha 15-naah hian rorel inkhawm ṭum 357 nei tawhin bill 181 pass a ni tawh bawk tih a sawi.