Krismas puala inkhawma tel vangin Maharashtra CM nupui sawisel

Maharashtra Chief Minister Devendra Fadnavis-a nupui, Amruta chu Thawhlehni khan Krismas puala charity event buatsaiha a tel avangin social media lamah sawisel a tawk nasa hle.

Banker leh social worker, Amruta hian Mumbai-a charity event neihnaa thlalakte chu a twitter-ah a tarlang a, hei vang hian beih zui a ni ta a ni. Mahse an sawiselnate hi chhangin, Amruta chuan hmangaihna, inlungruala leh khawngaihna te chuan sakhaw bik a nei lo a ni, a ti.

Amruta hi mi ṭhenkhat chuan Kristian sakhua chawi lar a, Hindu aṭanga Kristian-a mite hip luh tumah an puh a, Kristian missionary-te hmalaknate thlawpin a fuih phur a ni, an ti. Mahse Amruta chuan Hindu a nih thu a sawi a, India mipuite lungrual leh hlim taka an awm ho theihna turin theihtawp a chhuah zel dawn tih a sawi.