Delhi HC-in Sharad Yadav-a ngenna ngaihtuah dawn

Delhi High Court chuan JD(U) president hlui Sharad Yadav-an Rajya Sabha member a nihna aṭanga ban a nih chungchang hnawlsak tura a ngenna chu ngaihtuah a remti.

Acting Chief Justice Gita Mittal leh Justice C Hari Shankar awmna bench hnenah, Yadav-a ukil chu an ngenna hi ngaihtuah thuai turin a ngen a, ban a nihna hi hnawlsak lailawk turin a ngen a ni. Parliament thlasik ṭhutkhawm hi Zirtawpni aṭangin neih a ni dawn a, MP aṭanga banna hi hnawl a nih loh chuan session-ah Yadav hi a tel ve thei tawh dawn lo a ni.

JD(U) hruaitu hel, Sharad Yadav leh party MP dang Ali Anwar-te chu party kalphung leh duhdan kalha a chet avangin anmahnih duhthua party aṭanga inban niah sawiin, JD(U) chuan Rajya Sabha chairman hnenah Parliament member an nihna hi hlihsak turin a lo ngen tawh a ni. He ngenna hi Rajya Sabha chairman M Venkaiah Naidu chuan remtihsakin, December 4 khan MP an nihna aṭangin a ban a ni.

Sharad Yadav chuan MP an nihna aṭanga ban an nih chungchangah hian a hmain insawifiahna tur hun pawh engmah pek an ni lo tih a sawi. Hei vang hian RS chairman thupek lo siam tawh hi dan sak lailawk phawt turin a ngen.