Mamata-in Bengal-a kirte inhlawhna siamsak tiam

West Bengal Chief Minister Mamata Banerjee-i chuan Bengal aṭanga state danga inhlawhfa tura kal, an awmna hmuna tihduhdah leh enhran tawkte chu an state-ah an kir leh duh a nih chuan lawm taka an lo dawnsawn zel tur thu a sawi. Heng hnathawktute hi Bengal-a an let leh a nih chuan ni 200 inhlawhna tur siamsak a tiam bawk.

Kar hmasa khan Bengal aṭanga Rajasthan-a in sakna hmuna inhlawhfaa awm, Afrajul Khan chu rawng taka thatin halhlum a ni. Khan-a kut thlak lai video hi thehdarh a ni a, a nunna zuah turin a ngen a, mahse hal hlum a ni ta tho a ni. Khan hi Rajasthan-ah hian kum 20 chhung inhlawhfain a awm tawh a ni. West Bengal sorkar chaun Khan-a chhungte hi cheng nuai thum a pek tur thu a puang a, chhungkaw member pakhat hnenah sorkar hna pek a tiam bawk a ni.

He thil thleng vang hian Bengal CM chuan an state mi leh sa, state danga hnathawka awmte chu an awmna hmuna ralmuang lo leh ṭi taka an awm anih chuan Bengal lama let mai turin a ti a, an tan hna thawh tur lo siamsak a tiam a ni. State danga pem, rawn let lehte tan a tlem berah ni 100 inhlawhna tur lo siamsak zel turin district magistrate zawng zawng pawh a hriattir tawh thu a sawi.

Mamata Banerjee chuan BJP sawisel nghalin, BJP sorkarna state Rajasthan leh Gujarat-ahte chuan Muslim chauh ni lo, Kristian, dalit leh tribal miten beih an tawk fo tih a sawi. Mahse Bengal chu sakhaw tin zalenna hmun a nih avangin hetiang thil hi a thleng ve ngai lo, a ti.