FM-in economic package Hmanna tur ṭhenkhat sawifiah
Union finance minister Nirmala Sitharaman chuan nimin tlai khan press conference neiin, prime minister Narendra Modi-a'n hri leng avanga ramin kawng hrang hranga harsatna a tawh mek chhawmdawlna tur, economic package cheng vaibelchhe nuai 20 a puan tak kalpui a nih dan tur a puang.
PM Modi chuan Thawhlehni zana ram mipuite tana thuchah a sawiah, financial package Rs vbc nuai 20 siam a nih thu a puang a ni. He package hi India mahni kea a dinna tura lungphum pawimawh tak a ni dawn a ni tih sawiin, package hi India Gross Domestic Product (GDP) aṭangin 10% a tling a, sector hrang hrang chhawmdawlna atan hman a ni dawn tih PM chuan a sawi.
Nirmala Sitharaman chuan PM-in economic package a puan, Atmanirbha Bharat Abhiyan chu India ram chakna thar siamna tur a ni tiin, Modi-a'n midang rinchhan loa India a din theihna tur hmathlir a neihte chu an la puan belh zel dawn tih a sawi a ni.
Nimina press conference-ah hian ruahmanna siam Micro, Small and Medium Enterprises (MSME), employee providend fund , HFC leh MFI, discom, contractor leh real estate-te kaihhnawih thil a sawi a ni. Vawiinah finance minister hian press conference hi nei chhunzawm lehin, company lian zawk tana ruahmanna siam a puang leh ang.
Minister-in press conference-aa sawilan tlangpuite:
r MSME bik tan collateral free automatic loan cheng vaibelchhe nuai thum ruahman a ni. Hei hi kum li chhung atan niin, a kum khatnaah chuan rulh a ngai dawn lo a, unit nuai 45 velin an chhawr thei dawn a ni. MSME tana investment limit pawh ennawn
a ni bawk.
r Rs vbc 200 chin chu global tender phal a ni tawh dawn lo a, hei hian mahni kea dinna kawngah India a pui thei dawn a ni
r Thla thum chhung atana hnathawkte EPF peksakna turin Rs vbc 2,500 ruahman a ni. March, April, May thla chhung puihna tur chu PM Garib Kalyan scheme-ah telh a lo ni tawh a, hemi bakah hian thla thum dang June-August thleng pawhsei leh a ni.
r Non-banking financial companies (NBFC), housing finance companies (HFC), microfinance institutions (MFI) tan Rs vbc 30,000 ruahman a ni.
r Power distribution company tan Rs vbc 90,000 ruahman a ni.
r Sorkar contractor leh builder-te tan an project zawhna turin thla ruk hun pek belh an ni.
r Financial year 2019-20 atana income tax pek hun tawp chu November 30-ah pawhsei leh a ni a; tax audit date chu September 30 aṭangin October 31-ah sawn a ni.
r May 14 aṭanga nakkum March 31 thleng atana Tax Deducted at Source (TDS) leh Tax Collected at Source (TCS) rate chu rate pangngai aṭangin 25% a tihhniam a ni a, hei hi payment zawng zawngah hman a ni ang.