Paramilitary Canteen-ah India thil siam chauh zuar dawn

Ram chhunga paramilitary canteen-ah June 1 aṭangin India thil siam chiah zawrh chhuah a ni tawh dawn tih sorkar chuan a sawi. 

Prime minister Narendra Modi-a'n Thawhlehni zana ram thuchah a sawiah, hripui leng mek karah ram dangte rinchhan loa India a dinchhuah theihna turin ramchhung thil siamte ngaihlu turin mipuite a chah a, hemi hnu hian home ministry chuan Central Armed Police Forces (CAPF) canteen zawng zawngah India thil siam chauh zuar tawh turin thutlukna a siam zui ve nghal a ni. 

Union home minister Amit Shah chuan PM ngenna bawhzuiin he thutlukna hi siam a ni tih a sawi a, "CAPF nuai 10 leh an chhungte nuai 50 vel chuan canteen aṭang hian India thil siam ngei chauh leiin an hmang tawh dawn a ni," a ti. 

Paramilitary canteen-te hian kum khatah cheng vaibelchhe 2,800 vel an lei chhuak ṭhin. CAPF hian  Central Reserve Police Force (CRPF), Border Security Force (BSF), Central Industrial Security Force (CISF), Indo Tibetan Border Police (ITBP), Sashastra Seema Bal (SSB), National Security Guard (NSG) leh Assam Rifle-te a huam tel vek a ni. 

Home minister chuan, "He harsatna lian tak kan tawh mek hi remchangah kan hman thiam a ngai. India mi tupawhin ramchhung thil siam ngei a hman zel chuan, kan ram hi midang rinchhan ngai loin, mahni kea ding thei turin kan siam dawn a ni," tiin press statement a siamah a tarlang.