EC-in Rahul Gandhi hnenah hriattirna pe

Election Commission chuan Congress hruaitu, Rahul Gandhi chu Gujarat assembly inthlan neih turah model code of conduct palzuta puh a nih chungchangah insawifiah tura hriattirna a pe.

Rahul Gandhi hi inthlan neihna tur, Gujarat-a news channel pakhata interview a neih avangin Nilaini khan EC chuan dan palzuta puhin hriattirna hi a pe a ni. Rahul hian interview-ah hian Prime Minister Narendra Modi leh BJP chuan Gujarat harsatna neihte an ngaihthah a, mipuite vote hip tuma election campaign neihahte an rilru hruaipen tumah a puh a ni.

Congress party chuan EC-in Rahul Gandhi chauh insawifiah tura hriattirna a pek chungchang hi sawiselin, PM Modi leh BJP hruaitu dangte chuan vawi tam tak model code of conduct palzutah an puh.

Congress hruaitu Randeep Surjewala chuan Election Comission chuan Union Minister Piyush Gopal-an Gujarat inthlan chungchanga press conference vawi hnih a neihte chu a haider lui niin a sawi. Dik taka thiltih a nih dawn chuan PM Modi, BJP hotu Amit Shah, Finance Minister Arun Jaitley, Union Minister Piyush Goyal, Gujarat BJP president Jitu Vaghani, leh BJP hruaitu dangte lakah FIR thehluh a ni ngei tur a ni, a ti. Congress party hian BJP hruaituten model code of coduct an palzut avangin an laka FIR thelut tura an phutna memorandum chu EC hnenah hian an thehlut nghal bawk a ni.

Surjewala chuan kum 2014 inthlanpui neih hma ni chiah khan Modi chuan TV interview eng emaw zat a nei a, hei hi ram pumah tihchhuah a ni, a ti. Hei bakah hian ithlan ni pawhin Modi hian BJP symbol te a tilang bawk a, mahse heti chung hian EC chuan a chungah action a la lo niin a sawi bawk.