Delhi CM-in metro fare tihniam turin sorkar laipui ngen

Delhi Chief Minister Arvind Kerjiwal-a chuan sorkar laipui hnenah Delhi metro fare tihsan chu tihniam leh turin a ngen.

Arvind Kejriwal-a chuan Union housing and urban affairs minister Hardeep Singh chu lehkha thawnin, October thlaa metro fare tihsan chu sut a, September thlaa fare an hman ang kha hmang leh turin a ngen. Delhi CM chuan metro fare tihhniam avanga sum hloh tur zinga a zahve chu a kaihhruai sorkarin a tum tur thu a sawi bawk.

Kumin chhungin Delhi Metro Rail Corporation (DMRC) chuan metro fare hi ṭum hnih, May leh October thla khan a tisang tawh a ni. A tihsanna hi 100% zet a tling a ni.

Fare tihsan a nih hnu, October thla khan Delhi Metro chuan nikum hemi ang huna nikhata passenger a neih chu nuai thum zetin a pha lo ziah a ni. Hei hi fare a tihsan tak vang nia ngaih a ni.

Puri hnena lehkha a thawnah, Kejriwal-a chuan November thla chhung pawhin metro-in passenger a neih zat hi kum 2016 November thla aiin 10.5% in a tlahniam tih a sawi. Hetihlai hian fare tihsan a nih hma chuan passenger awm zat hi kumtinin 8.5–9% velin an pung ziah a ni.

Delhi Metro hi Delhi khawpui bakah national capital region-in a huam, Haryana leh Uttar Pradesh-ah hmangtu nitin nuai 30 chuang an awm ṭhin