Himachal Pradesh CM atan Sukhvinder Sukhu lak luh a ni

Himachal Pradesh Chief Minister thar atan nimin khan Sukhvinder Singh Sukhu chu Shimla-ah rinawmna thu thiamtira lakluh a ni. Himachal Pradesh Chief Minister 15-na a ni. A deputy atan Mukesh Agnihotri pawh lakluh a ni ve nghal bawk.

State assembly inthlan neih zawh takah Congress party chuan rorellai, BJP hnehin, assembly seat 68 awmah seat 40 an la a, BJP in seat 25 an la ve bawk.

Kar liam ta Inrinni khan Congress MLA thlan tharte chuan meeting neiin, Congress Legislature Party hotu atan kum 58 mi, assembly inthlana party campaign committee hotu Sukhu hi an thlang a ni.

Nimina CM lakluh inkhawmah Congress president Mallikarjun Kharge, Sonia Gandhi leh a fate pahnih - Rahul Gandhi leh Priyanka Gandhi Vadra-te pawhin an telpui a ni. Priyanka Gandhi hi Himachal Pradesh-ah hian party campaing in-charge a ni. Rajasthan chief miniter Ashok Gehlo leh Chhattisgarh chief minister Bhupesh Baghel-te pawh an tel bawk.

CM Singh hi thingtlang khaw chhuak, a pa bus driver ṭhin a ni. Law graduate niin, Himachal Pradesh University-a a kal laiin Congress party zirlai pawl, National Students' Union of India (NSUI)-ah tel ṭanin, a hnuah president te a ni chho. Kum 10 chhung Himachal Pradesh Youth Congress chief niin, kum 2013-3019 khan state Congress president a ni zui leh. Kum 2002 khan a ṭum khatna atan MLA-ah thlan tlin niin, MLA term li a chelhna a ni.

Deputy chief minister Mukesh Agnihotri hi MLA term ngana niin, assembly-ah leader of opposition a ni.