Amit Shah-a'n Maha leh Karnataka CM-te meeting neihpui dawn

Union home minister Amit Shah chuan ramri chungchanga buaina nei mek, Maharashtra leh Karnataka chief minister-te chu December 14 hian meeting a neihpui dawn.

Kar liam ta khan Maharastra-a eptu pawl, Maha Vikas Aghadi (MVA) MP-te chuan Amit Shah hi hmuin, state pahnihten ramri buaina chungchangah inrawlh turin an ngen a ni. Home Minister chuan December 14-ah state pahnih CM-te meeting neihpui hi a lo tiam tih an sawi.

Maharashtra leh Karnataka hian kum rei tak chhung ramri buaina hi a nei tawh a ni. Tun hnaia Karnataka chief minister Basavaraj Bommai-a'n ramri hrul, Maharashtra lama thingtlang khaw ṭhenkhat chuan Karnataka lama beh an duh zawk tia a sawi avangin an buaina hi a punlun thar leh a ni.

State ramri hi kum 1957 khan linguistic lines hmangin ṭhen a ni. Maharashtra hian Karnataka chhunga awm, Belagavi leh Marathi ṭawng hmanna thingtlang khaw 814 chu an state chinah a chhal a ni.

Kar liam ta khan Maharashtra aṭanga motor lutte chu Belagavi bialah mipuite lungin an lo tawng a, hemi chhan letnan hian Karnataka state transport bus-te chu Maharashtra-a rawng dumin an lo phuh ve leh bawk.

Shiv Sena (UBT) hruaitu Uddhav Thackeray chuan prime minister Narendra Modi chuan Maharashtra-Karnataka ramri buaina awm mekah a dinna chiang takin a sawilang tur a ni, a ti. Maharashtra BJP president Chandrasekhar Bawankule pawhin Supreme Court chuan an buaina neih mek chungchangah thutlukna a siam thuai a ṭul a ni tiin, border area boruak chu a ṭha lo chho zel a ni, a ti.