Parliament Winter Session nei ṭan
Parliament Winter Session chu nimin aṭang khan neih ṭan niin, session chhung hian bill tikhawtlai mek 25 leh bill thar 14 ngaihtuah tum a ni a, heng zingah hian Goods and Services Tax (GST) leh Muslim women rights bill te a tel.
Bill 25 ngaihtuah ṭhat tur zinga pawimawh zual tarlante chu -
1. The Goods & Services Tax (Compensation to States) Ordinance, 2017
2. Muslim Women (Protection of Rights on Marriage) Bill
3. Insolvency & Bankruptcy Code (Amendment) Ordinance, 2017
4. Indian Forest (Amendment) Ordinance, 2017
5. Surrogacy (Regulation) Bill, 2016
6. Prevention of Corruption (Amendment) Bill, 2013
7. Transgender Persons (Protection of Rights) Bill, 2016
Eptu party-te chuan sorkar lapui chu Gujarat leh Himachal Pradesh Assembly inthlan neih turah GST chungchanga sawichhuah a hlauh avangin Parliament winter session pawh tikhawtlaiah an puh. Gujarat assembly inthlan hi December 9 leh 14 khan neih niin, Himachal Pradesh inthlan hi November 9 khan neih a ni. State pahniha inthlan result hi December 18-ah puan a ni ang.
Prime Minister Narendra Modi chuan session tluang taka neih a nih theih nan, Ningani khan all party meeting a ko. Party hrang hrangte chu Parliament session tluang taka neih anih theih nan thawhhona ṭha nei turin a ngen a ni.
Parliament Winter Session hi nimin aṭang khan neih ṭan niin, nakkum January 5 thleng neih a ni ang. Session chhung hian Congress party chuan PM Modi-a kaihhruai sorkar chu kawng hrang hrangah nasa taka beih hle an tum. Lok Sabha-a eptu hruaitu, Mallikarjun Kharge chuan Congress party hian Goods and Services Tax (GST), demonetisation, Rafael deal leh ram economic dinhmunte chu sawichhuah ngei an tum tih a sawi.
Nimina Rajya Sabha inkhawmah chuan epty party-te chuan JD(U) hruaitu hlui Sharad Yadav leh party MP dang pakhatte disqualify an nih chungchang leh, tunhnaia PM Modi-a thusawi chungchangah lungawi loin rorel inkhawm an tibuai a, ṭum hnih inkhawm tihtawp lailawk a ngaih phah. Congress leh Samajwadi Party member-te chu House laiah chhuak khawmin, JD(U) MP pahnih ban an nih danah an lungawi loh thu an sawi a ni. Hei bakah hian PM Modi-an PM atana a thlak tak, Manmohan Singh chungchang a sawi danah an lungawi lohna Congress party chuan an lantir bawk.
Lok Sabha-ah chuan MP ṭanglai pathum leh MP hlui pasarih thi te sunna hun hman a ni hnuin inkhawm hi tihtawp a ni a, Thawhṭanni-a chhunzawm a ni ang. Sunna hun hman hma hian Congress MP thlan thar, Sunil Kumar Jakhar chu rinawmna thu tiamtira lakluh a ni. Hemi hnu hian Prime Minister Modi chuan a minister tharte hmelhriattirna hun a hmang zui a ni.